Cysgu Dan y Sêr

To read this blog in English please slick here

Blog gwadd gan Eleri Wynne, Swyddog Cyfathrebu RSPB Cymru

Mae mis Gorffennaf wedi cyrraedd pan fo’r haf yn llawn murmuron bywyd gwyllt o fore gwyn tan nos, gan gyfuno toriad y wawr a machlud pinc yr haul gyda’r nos. Ond wrth i ddyddiau poeth yr haf ddod i ben ac mae’n pennau ni’n cyffwrdd â’r gobennydd, y tu allan i’n ffenestri mae natur yn gwbl effro.

Yma yng Nghymru mae gyda’r nos yn cynnig posibiliadau diddiwedd i fywyd gwyllt, wrth i natur ymgynnull am ei hantur nos ei hun; o gri frawychus y dylluan frech, gwibio sydyn yr ystlum lleiaf soprano i sgrech y llwynog wrth iddo chwilio am gymar.

 
Chwith: Cysgu Dan y Sêr ar Ynys Echni, Dde: Llun gan Frank Herhold/Image Source

Diwedd Gorffennaf edrychwn ymlaen at dreulio noson gofiadwy yn y gwyllt ar gyfer ein noson Cysgu Dan y Sêr flynyddol, felly beth am ymuno â ni? Dyma’r cyfle perffaith i fynd yn wyllt a darganfod yn union pa rywogaethau sy’n dod allan wedi iddi nosi, p’un ai drwy glampio mewn carafán, gwneud lloches byd natur i chi eich hun neu gysgu dan y lloer.

Os nad yw aros adre’n apelio gallech hefyd ymuno â ni yn un o’n gwarchodfeydd natur i weld cyfoeth o fywyd gwyllt. Boed hynny yng nghoedwig dawel gwarchodfa RSPB Ynys-hir neu gors gwarchodfa  RSPB Conwy ac RSPB Gwlyptiroedd Casnewydd, mae gennym weithgareddau hwyl at ddant pawb - o wylio’r sêr a rhwydo pyllau, i hel straeon o gwmpas y tân. Mae’r hwyl yn parhau ar Ynys Echni yng Nghaerdydd hefyd lle’r rydym ni’n trefnu antur arbennig i ddarganfod trysorau byd natur ar drip gwersylla teuluol bythgofiadwy. Gyda harddwch Aber Afon Hafren o’n cwmpas, bydd y gwersyllwyr yn cael mwynhau golygfeydd hyfryd o diroedd pell. Mae cyfle iddyn nhw chwilio am drychfilod, cymryd rhan mewn saffari traeth a syrthio’i gysgu yn gwrando ar y tonnau’n torri ar y traeth.

Mae yna rywbeth hollol ramantus ac anturus am dreulio noson o dan y sêr. I ni oedolion gallai ddwyn atgofion am blentyndod yn yr awyr agored, ymhell o straen ein bywydau dyddiol. A pha blentyn sydd ddim yn hoff o aros ar ei traed yn hwyr? Gall y plant dreulio noson mewn lloches o frigau a dail, chwilio am drychfilod a darganfod pa greaduriaid sy’n ymddangos gyda’r nos. Efallai nad yw’r syniad o noson yn y gwyllt yn apelio llawer, ond p’un ai ydych yn wersyllwr o fri neu beidio, rydym ni’n addo os rhowch gynnig ar ymuno â chreaduriaid y nos Cymru, bydd yn brofiad gwerth chweil beth bynnag yw eich oedran.

I ddarganfod mwy am ein digwyddiadau Cysgu Dan y Sêr ar draws Cymru, ewch i www.rspb.org.uk/sleepout. Bydden ni wrth ein bodd yn clywed am eich anturiaethau gyda’r nos felly cofiwch gysylltu ar Twitter @RSPBCymru neu Facebook drwy fynd i RSPB Cymru – a defnyddio #BigWildSleepout or #CysguDanYSer.