Mae angen eich cymorth ar fyd natur

To read this in English click here 

Dywedwch wrth Lywodraeth Cymru osod camau priodol dros fyd natur yn ei gynllun adfer

Gallwch wneud hyn drwy yrru llythyr mewn ymateb i’r ymgynghoriad cyhoeddus sydd yn agored yr eiliad hon.

Mae’r Gweinidog dros Adnoddau Naturiol, Carl Sargeant, a’i swyddogion yn Llywodraeth Cymru’n datblygu Cynllun Adfer Natur a deddfwriaeth newydd, Mesur yr Amgylchedd (Cymru).  Fe all y cynllun polisi a’r gyfraith newydd fynd ymhell tuag at achub byd natur.  Ond, mae problem yn bodoli.

Nid oes digon o weithredu yn y cynllun i ateb anghenion byd natur.

Yn rhyfedd iawn, nid yw’r Cynllun Adfer Natur yn sôn llawer ynglŷn â sut yr ydym yn mynd i wireddu adferiad byd natur.  Ychydig iawn o weithredu sy’n cael ei gynnwys yn y cynllun.  Mae’n cynnwys llawer o eiriau da, ond nid yw’n dangos yr ymrwymiad i weithredu neu fynediad at nawdd a fydd yn gwneud y gwahaniaeth sydd ei angen ar fyd natur.

Yn hytrach, mae Llywodraeth Cymru wedi mynegi ei obaith dros adferiad byd natur gyda  syniad o’r enw “rheolaeth adnoddau naturiol”.  Mae hwn yn cynnig cyfuno cynlluniau a pholisïau er mwyn dod â’r ffyrdd gwahanol y mae pobl yn gweithio yn amgylchedd Cymru at ei gilydd, o ffermwyr i bysgotwyr a chadwraethwyr i weithwyr adeiladu.  Mae’r dull yma o weithredu cyfunol yn gwneud synnwyr ac yn angenrheidiol.  Ond mae’r Llywodraeth yn camddeall y nod os ydynt yn canolbwyntio ar broses yn hytrach nag ar weithredu dros fyd natur yn ein caeau, gwlyptiroedd, moroedd a mynyddoedd.  Ar ei ben ei hun, ni fydd “rheolaeth adnoddau naturiol” Llywodraeth Cymru’n ddigon i ddod â’n bywyd gwyllt yn ôl.

I sicrhau adferiad byd natur, mae angen arweiniad cryf gan y Llywodraeth:

• Rhaid i’r Cynllun Adfer Natur gynnwys cynllun gweithredu ar y ddaear a ariennir yn llawn i adfer ein bywyd gwyllt mwyaf gwerthfawr ac o dan fygythiad, a chreu gofod ar gyfer byd natur yn ein rhwydwaith o safleoedd arbennig, a ledled ein cefn gwlad a’n moroedd ehangach.  Rhaid cynnwys mesurau monitro fel ein bod yn gallu gweld a ydym yn ateb anghenion byd natur.

• Mae angen i’r Mesur Amgylchedd (Cymru) ddefnyddio ei rym i uno cymdeithas i achub byd natur.  Mae’n rhaid iddo osod targedau tymor hir sy’n gyfreithlon ymrwymol dros adferiad byd natur, a datgan dyletswydd ar bob corff cyhoeddus “i wireddu cadwraeth a gwella bioamrywiaeth” yn eu gweithgareddau.  Os gosodir y pwyntiau yma o fewn y gyfraith, bydd gweithredu dros fyd natur yn flaenoriaeth yng Nghymru. 

Helpwch i osod camau priodol o fewn y Cynllun Adfer Natur.

Mae gan yr RSPB dros 50,000 o aelodau yng Nghymru ac mae miloedd mwy’n caru byd natur.  Rydych yn un o ddegau o filoedd o bobl Cymru sy’n pryderu’n fawr am ein hamgylchedd naturiol, ac mae eich llais yn bwysig.  Ymunwch â ni i godi ein lleisiau yn uchel a chlir dros adar a bywyd gwyllt Cymru drwy ddweud wrth Lywodraeth Cymru gynnwys gweithredu dros fyd natur yn y Cynllun Adfer Natur.

E-bostiwch neu postiwch eich llythyr at Lywodraeth Cymru erbyn dydd Mercher 3 Rhagfyr i biodiversity@wales.gsi.gov.uk neu Gangen Bioamrywiaeth a Chadwraeth Natur, Rhodfa Padarn, Llanbadarn Fawr, Aberystwyth, Ceredigion, SY23 3UR.

I’ch helpu chi, dyma bedwar pwynt yr hoffech efallai eu cynnwys yn eich llythyr:

• Mae arnom angen cynllun gweithredu a ariennir yn llawn ac sy’n ateb anghenion byd natur.  Mae Llywodraeth Cymru’n credu y bydd ein bywyd gwyllt yn adfer oherwydd bydd dull newydd o weithredu o’r enw “Rheolaeth Adnoddau Naturiol” yn integreiddio polisïau a chynlluniau i newid y ffordd y mae pobl yn gweithio ledled yr amgylchedd yng Nghymru.  Gyda chymorth, fe all y broses hon gynorthwyo i ryw raddau, ond nid yw’n ddigon ar ei phen ei hun.

• Mae gwella ein rhwydwaith o fannau arbennig a’n bywyd gwyllt mwyaf gwerthfawr sydd o dan fygythiad yn hanfodol.  Mae angen i Lywodraeth Cymru fuddsoddi mewn adfer ein safleoedd arbennig a rhywogaethau a chynefinoedd â blaenoriaeth.  Mae’n rhaid i’n safleoedd fod yn fwy, yn well a gyda mwy o gysylltiad rhyngddynt i sicrhau adferiad ein bywyd gwyllt gwerthfawr sydd o dan fygythiad.  Mae ymrwymiad i wella’r arfau cadwraeth natur angenrheidiol hyn yn hanfodol.

• Mae buddsoddiad mewn tystiolaeth wyddonol yn hanfodol.  Mae arnom angen allu gweld beth sy’n gweithio a beth sy’n methu – mae monitro cyflwr safleoedd a thueddiadau ar gyfer ystod lawn o rywogaethau a chynefinoedd yn hanfodol.  Mae hyn yn ein helpu i adnabod anghenion byd natur ac yn sicrhau ein bod yn defnyddio’r arfau priodol ar gyfer y gwaith.  Ni allwn adfer y byd natur yr ydym wedi ei golli os na allwn weld beth ydym yn ei wneud.  

• Rhaid i Lywodraeth Cymru arddangos arweiniad cadarn ac uchelgais drwy sicrhau cyfraith i wireddu adferiad byd natur.  Mae angen i Fesur yr Amgylchedd (Cymru) osod targedau tymor hir sy’n gyfreithiol ymrwymol sy’n addo gwrthdroi prinhad byd natur.  Mae angen i’r gyfraith hefyd ddatgan ei fod yn ddyletswydd ar bob corff cyhoeddus “i wireddu cadwraeth a gwella bioamrywiaeth” yn eu gweithgareddau.  Bydd hyn yn sicrhau’r grym sydd ei angen ar adferiad byd natur i lwyddo.   

Gallwch ein helpu i fonitro cynnydd ein hymgyrch - e-bostiwch neu bostiwch gopi o’ch llythyr at Heather Galliford, Swyddog  Cadwraeth (Polisi ac Ymgyrchoedd) ar campaigns.wales@rspb.org.uk neu at RSPB Cymru, Tŷ Sutherland, Pontycastell, Heol Ddwyreiniol y Bont-faen, Caerdydd, CF11 9AB.

I dderbyn mwy o wybodaeth am ein hymgyrchoedd a sut i gymryd rhan ewch i – http://www.rspb.org.uk/joinandhelp/campaignwithus/

Diolch i chi am ymuno â ni i wneud gwahaniaeth ac i godi llais dros fyd natur.